ಕೆದಾಳಾ ಯೆತಲೊ ಗಿ ಪೋರ್ತುನ್ ತೊ ದೀಸ್ ?

“ಪಾಪ್ ಸಾಯ್ಬ್ ಆಯ್ಲೊ ಸಿಸಿಲ್ ಬಾಯೆ”ಹಾಂವೆಂ ಜೋರಾನ್ ಬೊಬ್ ಮಾರ್ಲಿ.

ಕುಜ್ನಾಂತ್ ಶಿತ್ ವಾಳ್ನ್ ಆಸಲ್ಲಿ ಸಿಸಿಲ್ ಬಾಯ್ ಮೊಡ್ಕಿ ಸಕ್ಲಾ ದೊವರ್ನ್ “ಆಜ್ ಕಿತೆಂ ವೆಗ್ಗಿನ್ ಆಯ್ಲೊ ರೆ. ರಾವಯ್ ರಾವಯ್ ತಾಕಾ. ಆತ್ತಾ ಆಯ್ಲಿ ಹಾಂವ್ “ಮುಣೊನ್ ಪೆಂಕ್ದ್ದಾಕ್ ಬಾಂದ್ಲೆಲೆ ಕಾಪಾಡ್ ಸೊಡೊವ್ನ್ ಭಾಯ್ರ್ ಆಯ್ಲಿ.

ಹಾಂವ್ ಆನಿ ಮುಜೊ ಈಷ್ಟ್ ಗಣೇಶ ಆಮ್ಚೆ ಗೋಲಿ ಚಡ್ಡೆಚ್ಯಾ ಪೊಕೆಟಿ ಭಿತರ್ ಘಾಲ್ನ್ ಪಾಪ್ ಸಾಯ್ಬಾಚ್ಯಾ ಸೈಕಾಲಾ ಪಾಟ್ಲ್ಯಾನ್ ಧಾವ್ಯ್ಲ್ಯಾಂವ್.

“ಹೋಯ್ ನಿತ್ಕಣಿ , ಬತ್ರ್ ಸಿಸಿಲಮ್ಮ ಈಗ ” ಶುದ್ದ್ ಕುಂದಾಪುರ ಕನ್ನಡಾಂತ್ ಗಣೇಶಾನ್ ಪಾಪ್ ಸಾಯ್ಬಾಕ್ ಆಮ್ಚೆ ಲಾಗ್ಗಿಂ ಅಪೊಯ್ಲೆಂ.

ಕುಶಿಲ್ಯಾ ಮೆಚ್ಚು ಬಾಯೆಚ್ಯಾ ಘರಾ ಸರ್ಶಿನ್ ಪಾವಲ್ಲೊ ಪಾಪ್ ಸಾಯ್ಬ್ , ತಾಚೆಂ ಸೈಕಲ್ ಯು  ಟರ್ನ್ ಕರ್ನ್ ಯೆಡ್ಡಿಯಾಬಾಚ್ಯಾ ಘರ ಆಯ್ಲೊ . ತಿತ್ಲ್ಯಾ ಭಿತರ್ ಎಡ್ಡಿಯಾಬಾಚಿ ಯೆಜ್ಮಾನ್ ಸಿಸಿಲ್ ಬಾಯ್ ಆಪ್ಲೆಂ ತೊಪ್ಲೆಂ ಕಾಣಘೆವ್ನ್ ತಯಾರ್ ರಾವಲ್ಲಿ ಆಂಗ್ಣಾಂತ್.

“ಗುಡ್ ಆಫ್ಟರ್ನೂನ್ ಸಿಸಿಲ್ ಬಾಯೆ. ತುಂ ಕಶಿ ಆಸಾ” ಪಾಪ್ ಸಾಯ್ಬಾಕ್ ಕೊಂಕಣಿ ಯೇನಾತ್ಲ್ಯಾರೀ ತಾಚಾ ಗ್ರಾಹಕ್ ಕುಟ್ಮಾಕ್  ಜಾತಾ ತಿತ್ಲೆ ಬೊರೆ ರೀತಿನ್ ಪೊಳ್ಳೆಂವ್ಕ್ ತೊ ಅಶೆತಾಲೊ.

“ಉಶಾರ್ ಆಸಾಂ ಪಾಪ್ ಸಾಯ್ಬಾನೊ . ತುಂ ಕಸೊ ಆಸಾಯ್. ಬಾಯ್ಲ್ ಭುರ್ಗಿಂ ಕಶಿಂ ಆಸಾತ್ “. ಸಿಸಿಲ್ ಬಾಯೆನ್ ವಿಚಾರ್ಲೆಂ.

ಗಣೇಶಾನ್ ಆನಿಂ ಹಾಂವೆಂ ಹ್ಯಾ ಮಾಸ್ಲಿ ಇಕ್ಚೆ ಸಾಯ್ಬಾಕ್ “ಪಾಪ್ ಸಾಯ್ಬ್ ” ಮುಣ್ ಆಡ್ ನಾಂವ್ ದವರೆಲ್ಲೆಂ. ಚಾಲ್ ಚಮ್ಕಾವ್ನಿ ಭಾರಿಸ್ ಪಾಪಾಚಿ ಹ್ಯಾ ಸಾಯ್ಬಾಚಿ. ಖಂಯ್ ಮೆಳ್ಳ್ಯಾರೀ ಹಾಸೊನ್ ಉಲೊಂಚೆ, ಕಷ್ಟ್ ದೂಕ್ ವಿಚಾರ್ಚೆಂ – ಮಾಕಾ ಹೊ ಸಾಯ್ಬ್ ಬಾರಿಸ್ ಮೊಗಾಸೊ. ಅಶೆಂಚ್ “ಬಿಸಾಯ್ಬ್” ( ಬೈಕಾಚೊ ಸಾಯ್ಬ್ ), “ದೇವ್ ಬೊರೆಂ ಕರುಂ ಸಾಯ್ಬ್ “, “ಲಾನ್ ಸಾಯ್ಬ್ “, “ವೊಡ್ಲೊ ಸಾಯ್ಬ್ ” ಮೊಸ್ತ್ ಸಾಯ್ಬ್ ಅಸಲ್ಲೆ . ಪುಣ್ ಪಾಪ್ ಸಾಯ್ಬ್ ಆಮ್ಕಾಂ ಪಸಂದಾಚೊ.

ಪಾಪ್  ಸಾಯ್ಬಾನ್ ಸಿಸಿಲ್ ಬಾಯೆಕ್ ಜವಾಬ್ ದಿಲಿ ” ಬೊರಿ ಆಸಾ ಸಿಸಿಲ್ ಬಾಯೆ. ಆತಾಂ ಪಾಂಚ್ವ್ಯಾಕ್ ರಾಕ್ತೆ ಆಸಾಂವ್”. ಆಪ್ಲ್ಯಾ ಮಾತ್ಯಾಕ್ ಬಾಂದಲ್ಲೊ ತುವಾಲೊ ಕಾಡ್ನ್ ಹಾಸೊನ್ ಸಾಂಗಾಲಾಗ್ಲೊ ಪಾಪ್ ಸಾಯ್ಬ್.

ಹಾಂವ್ ಆನಿಂ ಗಣೇಶ ಸೈಕಲಾಚ್ಯಾ ಪಾಟ್ಲ್ಯಾನ್ ಆಸಲ್ಲ್ಯಾ ದಾಲಿಯೆ ಥಾವ್ನ್ ಮಾಸ್ಲಿ ಪೊಳ್ಳೇವ್ನ್ ಆಸಲ್ಲ್ಯಾವ್ . ಲಾನ್ ಬಾಂಗ್ಡೆ , ಇಲ್ಲೆ ಸೊವ್ಣ್ದಾಳೆ , ಲಾಂಶೆ ತಾರ್ಲೆ ಆನಿಂ ಪಿಟೊ ಮಾಸ್ಲಿ ಹಾಡ್ನ್ ಆಯಿಲ್ಲೊ ಪಾಪ್ ಸಾಯ್ಬ್ .

“ಬೊರಿ ಮಾಸ್ಲಿ ಪೂರಾ ತಾಂಗೆರ್ ದೀವ್ನ್ ಅಯ್ಲೊಯ್ ಗಿ ಸಾಯ್ಬಾ”. ಸಿಸಿಲ್ ಬಾಯೆನ್ ವಿಚಾರ್ಲೆನ್ಸ್ .

“ಎಂತ ಅಮ್ಮ. ಹಾಂವ್ ತುಕಾ ತಶಿ ಪೂರಾ ಕರ್ತಾ ಗಿ. ಮೆಳಲ್ಲಿ ಮಾಸ್ಲಿ ತುಕಾ ಫಸ್ಟ್ ದಿತಾ ಹಾಂವ್ “. ಪಾಪ್ ಸಾಯ್ಬಾಕ್ ಇಲ್ಲೆ ಬೆಜಾರ್ ಕೆಲ್ಲೆಂ  ಸಿಸಿಲ್ ಬಾಯೆಚಿ ಉತ್ರಾನಿಂ.

ಸಿಸಿಲ್ ಬಾಯ್ ಥಾಯ್ನ್ಚ್ ಬಂದ್ ಕರ್ನಾಸ್ತಾನ ” ತುಜೆ ಬೂದಿ ಗೊತ್ತುನಾ ಗಿ ಮಾಕಾ. ಪೋರ್ ಚಾರ್ ಷತ್ಕಾ ಹಾಡ್ನ್ , ತಾಂಚ್ಯಾ ಘರಾ ದೀವ್ನ್ , ಮಾಕಾ ತಾರ್ಲೆ ಹಾಡ್ನ್ ” ಮಾಸ್ಲಿಚ್ ನಾ ಮಾರ್ಕೆಟಿಂತ್, ಖಾಲಿ ತಾರ್ಲೆ ” ಮುಣೊನ್ ಮಾಕಾ ಮಂಗ ಕರ್ನ್ ಗೆಲೊಯ್ “

“ಕೊಣೆ ಮಂಗ ಕೆಲಿ ತುಕಾ . ಹಾಂವ್ ತಶಿ ಪೂರಾ ಕರಿನಾ ಸಿಸಿಲ್ ಬಾಯ್”. ಪಾಪ್ ಸಾಯ್ಬ್ ನಿಜಾಯ್ಕಿ ಬೆಜಾರಾಯೆನ್ ಉಲಯ್ಲೊ.

“ಅದ್ ಈವ್ರ್ ಅಲ್ದೆ. ಈವ್ರ್ ವೊಳ್ಳಿಯವ್ರ್ ” ಗಣೇಶಾನ್ ಹಳೂ ಸಾಂಗ್ಲೆಂ ಸಿಸಿಲ್ ಬಾಯೆಕ್ .

ಸಿಸಿಲ್ ಬಾಯೆಕ್ ಆಪ್ಲಿ ಚೂಕ್ ಕಳ್ಳಿ ” ಹೊ . ಚೂಕ್ ಜಾಲಿ ಪಾಪ್ ಸಾಯ್ಬಾನೊ . ಚಲ್ ಏಕ್ ವೀಚ್ ರೂಪಿಯೆಚೆ ಸೊಂವ್ದಾಳೆ ಘಾಲ್  ಪೊಳೆಯಾಂ .” ಆಪ್ಲೆಂ ತೊಪ್ಲೆಂ ಮುಕಾರ್ ದೀವ್ನ್ ” ಆತ್ತಾಂ ಯೆತಾ ರಾವ್ ” ಮುಣೊನ್ ಸಿಸಿಲ್ ಬಾಯ್ ಭಿತರ್ ಗೆಲಿ

“ಧಾ ರುಪ್ಯಾಂಕ್ ಚಾರ್ ಸಿಸಿಲಮ್ಮ “. ಪಾಪ್ ಸಾಯ್ಬಾಚೆಂ ಮೋಲ್ ಆಯ್ಕುನ್ ಭಿತರ್ ಥಾವ್ನ್ ಎಡ್ಡಿಯಾಬ್ ಭಾಯ್ರ್ ಯೇವ್ನ್ ಪಾವ್ಲೋ.

“ಹೊ ಎಡ್ಡಿಯಾಬಾ . ಕಶಿ ಆಸಾ ತುಂ “. ಪಾಪ್ ಸಾಯ್ಬಾನ್ ಸುರು ಕೆಲೆಂ.

“ಚಾರ್ ಆಸಲ್ಲೆ ಪಾಂಚ್ ಕರ್ ಪಾಪ್ ಸಾಯ್ಬಾ. ತುಕಾ ಆನಿ ಚಾರ್ ಭುರ್ಗಿಂ ಜಾಂವ್ಡಿ ಮುಣೊನ್ ಮಾಗ್ತಾ”. ಎಡ್ಡಿಯಾಬಾಚೆಂ ನೆಗೋಷಿಯೇಷನ್ ಚಾಲು ಜಾಲೆಂಚ್ .

“ಕಸಲೆಂ ಎಡ್ಡಿಯಾಬಾ ತು. ಧಾ ರುಪ್ಯಾಕ್ ಪಾಂಚ್ ದೀವ್ನ್ ಹಾಂವ್ ಘೆತ್ಲೆಂ. ತುಕಾ ಕಶಿ ದೀಂವ್ಚಿ ಹಾಂವ್”. ಪಾಪ್ ಸಾಯ್ಬಾನ್ ಆಪ್ಲೆ ಕಷ್ಟ್ ಸಾಂಗ್ಲೆ .”ಪೂಣ್ ಮುಜೆ ಖಾತಿರ್ ತು ಮಾಗ್ತಾ  ನೆ . ಧರ್ ಸಿಸಿಲ್ ಬಾಯೆ , ತುಕಾ ಧಾ ರೂಪಿಯೆಕ್ ಪಾಂಚ್ ಆನಿ ಎಡ್ಡಿಯಾಬಾಕ್ ದೋನ್ ಚಡ್ – ಫ್ರೈ ಕರುಂಕ್”. ಮುಣೊನ್ ಬಾರಾ ಸೊವ್ಣ್ದಾಳೆ ಸಿಸಿಲ್ ಬಾಯೆಚ್ಯಾ ತೊಪ್ಲ್ಯಾನ್ತ್ ಘಾಲ್ನ್ ಪೋ ಪೋ  ಕರ್ನ್ ಮೆಚ್ಚು ಬಾಯೆಚ್ಯಾ ಘರಾ ಭೆಟ್ ದೀವ್ನ್ಕ್ ಗೆಲೊ ಪಾಪ್ ಸಾಯ್ಬ್

ಸುಮಾರ್ ಆದ್ಲಿ ಗಜಾಲ್ ಹಿ. ಹಾಂವ್ ಆನಿ ಗಣೇಶ ಆತಾಂ ಗೋಲಿ ಸೊಡ್ನ್ ಮೊಬೈಲ್ ಫೊನಾನಿ ಖೆಳ್ತಾಂವ್.ಪಾಪ್ ಸಾಯ್ಬ್ ಚರ್ಲಾ, ಭಿಸಾಯ್ಬ್ ಸೌದಿ ವೊಸುನ್ ಘೊಳ್ಳ್ನ್ ಗ್ರೇಸ್ತ್ ಜಾಲಾ . ಆಮ್ಚಿ ಮಾಸ್ಲಿ ಕಾಣ್ನಘೆವ್ಚಿ ರೀತ್ ಬದಲ್ಲ್ಯಾ. ಸದ್ದಾಂ ಇಕ್ರಾ ಬಾರಾ ವೊರಾರ್  “ಪೇ  ಪೋ ” ಕರ್ನ್ ಯೆಂವ್ಚೆ ಸಾಯ್ಬ್ ಆತಾಂ ಯೇನಾಂತ್. ಮಾಸ್ಲಿ ಕಿಲೊ ಲೆಕಾರ್ ಇಕ್ತಾತ್ . ಪಾಪ್  ಸಾಯ್ಬಾ ಬರಿ ಆಸಲ್ಲೆ ಬರೆ ದೋನ್ ತಾರ್ಲೆ , ಏಕ್ ಬಾಂಗ್ದೋ ಘಾಲ್ಚೆ ದೀಸ್ ನಂಪಯ್ನ್ಚ್ ಜಾಲ್ಯಾತ್.

ಪಾಪಸಾಯ್ಬಾಚೆ ಸೈಕಲಾಂಕ್ ರಾಕುನ್ , ಆಳೆನಾ ವಾಟ್ಚೆ ದೀಸ್ ಫ್ರಿಡ್ಜಾಂತ್ ಥಂಡ್ ಜಾವ್ನ್ ಗೆಲ್ಯಾನ್ತ್ .

• ಕೆದಾಳಾ ಯೆತಲೊ ಗಿ ಪೋರ್ತುನ್ ತೊ ದೀಸ್ ?